Niina Kuittinen (Oona Airola) er småbarnsmor, har ein valdeleg eks-partnar, og er i beit for arbeid. Det høyrest ikkje nødvendigvis ut som introduksjonen til ein sjarmerande forviklingskomedie, men bland inn lokalavisjournalistikk, stor-politikk, ein sovjetisk missil på avvege, det beste 1984 kan by på av popmusikk og hockeysveis, og Nord-Finsk kultur – då sit han som ei kule.

Regissør og manusforfattar Miia Tervo tar på elegant vis utgangspunkt i ei faktisk hending der sovjetisk marine greidde å skyte ein missil inn i Finland (via Pasvik) i romjola i 1984, og skildrar med overtyding det kaoset det lagar på den elles avmålte og trauste Nord-Finske landsbygda. Desse omstenda gjev den ferske lokalavisreportaren Niina sjansen til å ta eit oppgjer med alle rundt henne som ikkje har trua på henne.

Kritiske merknadar peikar på at filmen sjangermessig er korkje fugl eller fisk – korkje drama, komedie eller kald krigs-thriller. Medan dei positive omtalane av filmen mellom anna dreg fram kameraarbeidet og skodespelarprestasjonen til hovudrolleinnehavar Oona Airola – ho vann Dragon Award Best Acting på Göteborg film festival i 2024 for tolkinga si av Niina.

Filmen vises i samarbeid med Ladaklubben ved UiT.

“- Skal vi danse?
- Du vil få det meste ut av livet før en atomkrig, ikke sant?”

THE MISSILE
OHJUS
Finland/Estland 2024
Regi: Miia Tervo
Medv: Oona Airola, Hannu-Pekka Björkman, Pyry Kähkönen, Emma Kilpimaa
Spilletid: 114 min
Språk: Finsk (engelsk tekst)
Aldersgrense: 12 år
Omtale: Åsne Ø. Høgetveit

Trivia
I eit intervju med Variety uttala Miia Tervo at om ho ikkje hadde byrja arbeidet med The Missile før Russlands storskalainvasjon av Ukraina, så hadde han kanskje aldri vorte noko av.